唔知大家有冇試過射精後覺得條J好痛？其實好大機會係前列腺發炎！想知自己係咪都係有前列腺炎，咁就要睇吓有冇以下嘅症狀啦！
前列腺功能
前列腺屬於男性生殖系統嘅一部份，係一種呈胡桃狀的腺體，位於膀胱嘅下面，直腸前面，包圍住尿道。它嘅主要功能係分泌一種乳白色嘅液體，呢種液體同精子混合成精液，幫精子射出體外。
前列腺炎成因
前列腺炎主要可以分為四類，急性細菌感染前列腺、慢性細菌感染前列腺炎、非細菌感染前列腺炎，同埋前列腺疼痛（又稱「慢性骨盆疼痛綜合徵」 (CCPS)）。
（一）急性或慢性細菌感染前列腺炎通常都係由幾種細菌感染引致。感染嘅途徑大多數都係經尿道、血液或淋巴系統感染。
- 尿道感染：細菌經由尿道進入前列腺，引起急性或慢性前列腺炎。
- 血液感染：細菌經過身體其他部位如皮膚、呼吸道、扁桃腺或者腸道感染，通過血液流至前列腺，引起前列腺炎。
- 淋巴系統感染：如果前列腺鄰近的器官（例如膀胱、尿道、直腸）發炎，細菌有可能經淋巴管感染前列腺。
（二）非細菌性前列腺炎的病因尚不清楚。在非細菌性前列腺炎的前列腺分泌物中有異常數量的炎症細胞，有指非細菌性前列腺炎同某啲非常見嘅病原體（如專性厭氧菌、支原體、衣原體，或其它原蟲、病毒等）有關，但未有充分的證據證實。
（三）前列腺疼痛的成因同炎症無關，主要遭受盆底肌緊張性肌痛，源於盆底骨骼肌收縮和痙攣，同前列腺周圍嘅神經同肌肉嘅異常變化有關係。
細菌感染前列腺炎症狀
前列腺炎發生嘅時候，常見症狀為前列腺腫脹、疼痛、甚至偶然阻塞尿道管而導致排尿困難。但係根據各類前列腺炎的成因同類型，佢嘅症狀亦有所不同。無症狀性前列腺炎患者甚至可能冇任何嘅症狀示警。
急性細菌感染前列腺炎
急性細菌感染前列腺炎嘅病徵會比較嚴重，但通常係治療後一個星期就會痊癒。
發病時會突然發燒發冷、成日要去廁所，係生殖器、會陰、骨盆同下背部區域可見劇烈疼痛感。而且排便同射精時會更痛。亦會有急性尿滯留，即患者會因排尿困難導致尿液滯留，因此如果發現自己患病必須即時就醫。
慢性細菌感染前列腺炎及非細菌感染前列腺炎
慢性細菌感染前列腺炎同非細菌感染前列腺炎嘅症狀十分相似，差別只在於非細菌感染測試唔到致病嘅細菌，感染時間相比之下會比較長，可以持續三個月或以上。
發病時生殖器、會陰同盆骨區域會有可見性的慢性疼痛，更可能蔓延到後腰骶背部，會有尿頻、屙尿困難、同時屙尿、性交和射精嘅時候好痛，夜尿症、精液帶血，甚至不舉嘅徵狀。會有前列腺肥大或前列腺壓痛嘅問題（呢個問題可以通過直腸檢查確診）。
前列腺疼痛
前列腺疼痛比較常見，冇炎症嘅跡象。主要徵狀係會陰、睾丸、陰莖、膀胱等部位疼痛同不適、尿頻、屙尿有困難、屙尿同射精嘅時候會好痛等等。
注意，如果前列腺炎冇得到及時嘅治療，有可能會發展成嚴重甚至致命性嘅併發症，例如：不育、敗血症、附睾炎、前列腺膿腫等。所以如果懷疑自己有可能有前列腺發炎，就要儘快去醫院求醫啦！
